مقترح تنظيمي للنقاش المشترك
اقتراح لترتيب شغل سوريون بلا حدود
يا جماعة، أول شي شكراً كتير كتير على تعبكن وعلى التنظيم الممتاز. أمسية الجهبذ كانت رائعة، والحمد لله الناس انبسطت، وكل شي كان ظابط. يعطيكن ألف عافية.
حطّيت اقتراح لترتيب الشغل اللي قدامنا. الفكرة إنه كل شغلة إلها موعد، ومنعرف شو لازم يخلص قبلها، لحتى نقدر نقدّم ونأخّر بلا ما نخرّب شي.
نقسم الشغل على تلات مراحل
-
1
هلأ
لحد ذكرى التحرير، 12 كانون الأول 2026.
-
2
بعدين
من كانون الأول لشباط 2027.
-
3
لاحقاً
من شباط 2027 وطالع.
وكل شغلة إلها وحدة من تلات علامات
الوضع الحالي
وين وصلنا
خلّصنا
4 خطوات منجزة- أمسية الجهبذ، بتوفيق ونجاح وبجهودكن.
- أعلنّا احتفالية الذكرى التانية للتحرير بـ 12/12/2026.
- صار عنا موقع، وخمس دومينات، وإيميل إداري محمي.
- كتبنا مسودة نظام داخلي من 11 باب، والاسم طلع متاح متل ما حكيت زينة.
ناقصنا
4 نقاط للمتابعة- الجمعية لسا مو مسجلة رسمياً.
- ما عنا حساب بنك باسم الجمعية، ومصاري التذاكر لسا عم تمرق على حساب شخصي. وهاد ممكن يعمل إشكاليات، وممكن يضر حتى صاحب الحساب.
- الإيميل الرسمي info@syrianswithoutborders.ca لسا ما اشتغل.
- قاعة الاحتفالية وتفاصيلها لسا ما انحسمت.
وبالاجتماع الماضي بـ Juliette & Chocolat، هزار قالت رح تسجّل التفاصيل وتبعتلنا ياها. هزار، إذا سجّلتيها ابعتيها، لنعرف إذا ناقصنا شي.
تنظيم المواعيد والأولويات
تفاصيل المراحل الثلاث
-
هلأ: لحد 12 كانون الأول ثابتة
1. الاحتفالية وصفحتها عالموقع (السبت 12 كانون الأول)
ناطرين تأكيد القاعة: هزار وهاني، حجزتوها ولا بدكن تحجزوها؟ وإذا بدكن، أنا بحجزها. وكمان لازم نتفق على أسعار التذاكر.
-
هلأ: لحد 12 كانون الأول مرنة
2. الإيميل الرسمي info@syrianswithoutborders.ca
تفعيل الإيميل الرسمي للجمعية بكانون الأول.
-
هلأ: لحد 12 كانون الأول مربوطة
3. قرار التسجيل (هالشهر)
اتفقنا إنها جمعية غير ربحية، وبنقاش الواتساب وصلنا مبدئياً إنه نسجّل بكيبيك بس. ضل نقرر مين بدو يشارك بالتسجيل الرسمي. الحد الأدنى 3 أشخاص، واللي حابب يشارك يحكي. هاد أهم قرار هلأ، لأن حجز الاسم وطلب التسجيل وحساب البنك كلهن ناطرينه.
-
بعدين: من كانون الأول لشباط مربوطة بقرار التسجيل
1. حجز الاسم Syriens sans frontières
حالياً على حد علمي بـ 27 دولار لمدة 90 يوم.
-
بعدين: من كانون الأول لشباط مرنة
2. مراجعة محامي ومحاسب
محامي ومحاسب يراجعوا أهداف الجمعية والنظام الداخلي قبل ما نقدّم الطلب.
-
بعدين: من كانون الأول لشباط مربوطة بالاسم وبالمشاركين بالتسجيل
3. تقديم طلب التسجيل RE-303
حالياً على حد علمي بـ 199 دولار، أو 298.50 إذا بدنا ياه مستعجل. بيوقّع عليه 3 أشخاص عالأقل (وبنفس الطلب منثبّت الاسم بالفرنسي Syriens sans frontières والنسخة الإنجليزية Syrians Without Borders بلا رسوم إضافية).
-
بعدين: من كانون الأول لشباط ثابتة
4. الإقرار الأولي
إجباري وببلاش، وبينعمل خلال 60 يوم من التسجيل، ومعه هويات أعضاء المجلس.
-
بعدين: من كانون الأول لشباط مربوطة برقم التسجيل NEQ
5. فتح حساب بنك باسم الجمعية بتوقيعين
هدفنا يكون بشباط 2027.
-
بعدين: من كانون الأول لشباط مرنة
6. تحويل النظام الداخلي لقانون كيبيك
نحوّل النظام الداخلي لقانون كيبيك من هلأ، ومنعتمده بعد التسجيل.
-
لاحقاً: من شباط 2027 مربوطة بحساب البنك
1. نقل حساب التذاكر ومصاريه لاسم الجمعية
خلال 90 يوم من فتح حساب البنك.
-
لاحقاً: من شباط 2027 مربوطة بحساب البنك
2. فتح التبرعات والعضوية عن طريق منصة متل Zeffy
بلا إيصالات ضريبية، لأنها بس للجمعيات الخيرية المسجلة.
-
لاحقاً: من شباط 2027 مربوطة بالتسجيل
3. التقديم عالمنح والبرامج المجانية
منجرّب نقدّم عالمنح والبرامج المجانية، متل Google for Nonprofits ومنح الحكومة، وهاد بعد التسجيل.
-
لاحقاً: من شباط 2027 مربوطة
4. الموقع الكامل بتلات لغات
مين نحنا، والفعاليات، والتبرع.
-
لاحقاً: من شباط 2027 مربوطة بالتسجيل
5. نقل الدومينات والحسابات لحساب باسم الجمعية
بعد التسجيل، وأبداً مو وقت بيع تذاكر.
ما في بنود ضمن هاد الفلتر بهي المرحلة — اضغط على «كل العلامات» أو «عرض المراحل معاً».
بالتوازي: عم ابعت النظام الداخلي عالمجموعة لنتفق عليه سوا، لأني ما بدي أتصرف لحالي، وبحب ناخد رأي الكل بكل شي. والمسودة كتبتها بحسب القانون الفدرالي، فرح ارجع اضبطها بحسب قانون كيبيك. بس بنفس الوقت خلّونا نمشي: اللي مو فاضي يقول، وما منضل ناطرينه، واللي فاضي وجاهز يكون معنا.
ترابط الخطوات
السلسلة اللي لازم ننتبهلها
كل خطوة من خطوات التأسيس مربوطة باللي قبلها مباشرة — اضغط على أي خطوة لاستعراض تفاصيلها:
-
نثبّت التسجيل بكيبيك، ومين بدو يشارك بالتسجيل الرسمي (الحد الأدنى 3 أشخاص).
-
حجز الاسم Syriens sans frontières بـ 27 دولار لمدة 90 يوم فور حسم قرار التسجيل.
-
تقديم طلب التأسيس بكيبيك (199$ عادي أو 298.50$ مستعجل) موقعاً من 3 أشخاص عالأقل.
-
صدور رقم التسجيل الرسمي NEQ وتقديم الإقرار الأولي المجاني خلال 60 يوم.
-
فتح حساب بنك رسمي باسم الجمعية بتوقيعين (الهدف بشباط 2027).
-
من حساب البنك بتنفتح التذاكر باسمنا والتبرعات عبر Zeffy والتقديم على المنح.
خلاصة السلسلة: إذا تأخر قرار الفريق، بيتأخر كل شي بعده.
الهدف: فتح حساب البنك بشباط 2027التواصل وبناء القاعدة المجتمعية
نكبّر الكوميونيتي
الكوميونيتي عنا لسا مو فعّال كتير، ولازم نستغل كل تجمّع لنكبّر الناس اللي بيتابعوا سوريون بلا حدود وبيدعموها. الناس لما بتحس حالها مشاركة، بتقرب أكتر.
بأمسية الجهبذ كان عنا حوالي 250 شخص، وهي فرصة ما بتتعوّض بسهولة، ومو أكيد إنه كلهن رح يجوا عالتحرير.
فبالاحتفالية خلّونا نجهّز باركود (QR Code) للانضمام لمجموعة الواتساب تبع الكوميونيتي، بالإضافة لخيار تسجيل الاسم والإيميل للي حابب يتطوع أو يشارك بالفعاليات الجاية. ونذكر الكوميونيتي بكل منشور، ونحط رابطه على صفحة الفيسبوك.
أهلاً بك في كوميونيتي سوريون بلا حدود
بياخد الضيف مباشرة لرابط مجموعة الواتساب الخاصة بالكوميونيتي ليبقى قريب من كل أنشطتنا وفعالياتنا.
بيسجّل الضيف اسمه وإيميله إذا حابب يتطوع أو يشارك بالفعاليات الجاية — بدون أي طلب تبرع مالي.
نقاط النقاش والاتفاق
القرارات والأسئلة المطروحة بين إيديكن
القرارات اللي لازم نبتّ فيها
-
1. أسعار تذاكر الاحتفالية
نتفق على السعر المناسب لننشره على صفحة الاحتفالية بالموقع.
-
2. وين نسجّل
اللي شاركوا بنقاش الواتساب وصلنا مبدئياً إنه نسجّل بكيبيك بس، حالياً على حد علمي بـ 199 دولار وإقرار سنوي واحد (Québec.ca - RE-303). بدنا نثبّت هالقرار.
وعندي سؤالين لنقاشنا
-
1. الهوية البصرية
منشتغل عليها قبل الاحتفالية ولا بعدها؟ إذا خلصت قبل، بيكون كل شي مننشره عن الاحتفالية جاهز وبنفس الشكل. والهوية يعني الخط اللي منستعمله بكل المنشورات والصور، والألوان ودرجاتها، لحتى يطلع كل شي احترافي.
-
2. الموقع الكامل
بدكن أشتغل على تصميمه بالتوازي من هلأ، ولا منستنى لأنه في شغلات ممكن تتغيّر؟ المهم نمشي لحتى ما نتأخر.
وكمان في شغلات لازم نتفق عليها بالاجتماعات الجاية:
- المحامي والمحاسب
- عدد أعضاء مجلس الإدارة ومدتهم
- النصاب
- سقف الصرف
- السنة المالية
- منصة التذاكر والتبرعات
يعطيكن العافية يا جماعة. هاي الأفكار اللي كان بدي اعرضها عليكن. وخلّونا نتوزّع الشغل، لأنه لما بيتقسم على أكتر من شخص بيصير أسهل، وما بدنا يكون الحمل كله فوق كتاف حدا. قولولي رأيكن، وإذا بدكن تزيدوا أو تغيّروا شي.